הונדערטער בוגרי וידידי הישיבה לעבן מיט גייסטרייכע שעות

ביי גראנדיעזן דינער “גיבורי התורה” פאר “ישיבת מיר”

אויסנאמליכע פראגראם מיט געשפאנטע דרשות און רייכע פרעזענטאציעס פולט אן דעם נאכט מיט תוכן און געשמאק מתחלה ועד סוף -געפאקטע זאל מיט “רעזערווירטע זיצן” שטרייכט ארויס דעם שעצונג פון די חשוב’ע נדיבי עם פאר די רבבה עמלי התורה בין כותלי הישיבה – 

שוין פון די פריע אויפדערנאכט שעה’ן אום מיטוואך וארא האט זיך אנגעהויבן דער מאסן-שטראם ביים ווינקל פון פערצן און -פופציג, ווען אלעס ווענדט זייער טריט צום “עטרת גאלדא זאל’ן” מיטן רעזערוואציע-קארטל אין האנט. כדי צו קענען האלטן א מוסטערהאפטן סדר און פארזיכערן די מאקסימום הנאה פון די חשוב’ע תומכים

אין באזונדערע זאלן אויפן אונטערשטן שטאק האבן די חשוב’ע עלטערן שיחי’ הורי התלמידים געהאט די געלעגנהייט זיך צו טרעפן פערזענליך מיט חשוב’ע מגידי שיעור שליט”א וועלכע זענען ספעציעל געקומען צו פארן מעבר לים צו איבערגעבן ערשטהאנטיגע גרוסן מהנעשה והנשמע בין כותלי הישיבה. די טאטעס האבן געקוואלן פון נחת הערנדיג ווי שטארק זייער בחור שטייגט בתורה ועבודת ה’ און נוצט אויס די צייט ווי ס’באדארף צו זיין אריינקומענדיג אין זאל האט זיך דאס אויג נישט געקענט זעטיגן פון דאס פראכטפולקייט און רייכקייט וואס האט ארויסגעשיינט פון אלע ווינקלען. די טישן זענען געווען הערליך צוגעגרייט אויף א מלכות’דיגע פארנעם, ווען אויפן מזרח-ברייט ציט זיך דער אויבן-אן וועלכע איז במשך די נאכט באשיינט געווארן דורך פילע רבנים הגאונים הצדיקים שליט”א, און צו די צוויי זייטן זענען אויסגעשטעלט די מטיבי נגן פונעם פילהארמאנישן “שירה” כאר מיטזינגענדיג מיטן הארץ-שטים פון ר’ זאנוויל וויינבערגער הי”ו, ווען די רייכע ארקעסטרע אונטערן געטיגן פירערשאפט פון ר’ יושע קאלער הי”ו שפילט אונטער פאכמאניש און מאסיוו

דער חשוב’ער מרביץ תורה הרב חיים אליהו קאסירער ראש חבורה בישיבה האט געעפנט דעם מעמד מיט פאסיגע דיבורים, ארויסברענגנדיג די געפילן אלס איינער וואס לעבט מיט די ישיבה

דאן האט הר”ר הערשל קויפמאן הי”ו אויפגעטרעטן און האט אויסגעשמועסט איבער דעם ציל פונעם “גיבורי התורה” קאמפיין און היינט-נאכטיגן אווענט, צו ארויסהייבן און שטיצן די זעקס טויזנט אינגעלייט גיבורי התורה

ביותרת הכבוד האט דער פול-געפאקטער זאל זיך צוגעהערט צום קול ה’ בהדר מפום ממלל רברבן כבוד הגאון הראש ישיבה שליט”א, איבער די חשיבות פון די לומדי תורה אין ישיבה וועלכע זענען מחזיק די גאנצע וועלט בכח תורתם, און מעומק לבבו באדאנקט די עוסקים במלאכת הקודש, און אלע עסקנים וועלכע האבן זיך אוועקגעגעבן להצלחת המעמד, און אנגעוואונטשן בברכת התורה פאר אלע חשוב’ע תומכים ומחזיקי התורה וועלכע העלפן צו למען החזקת הישיבה בנדיבות לבם הטוב

דאן האט הר”ר הערשל קויפמאן הי”ו ארויסגעברענגט א דאנק פאר די צענדליגע עסקנים וועלכע האבן ארויסגעהאלפן פארן דינער קאמפיין און מעמד הנהדר, ובראשם האט ער ארויסגעהויבן די פעולות נשגבות פון הר”ר דוב בריעגער הי”ו, וועלכע איז עומד בראש הפאנדרעיזינג ברוחב בינתו וכשרונותיו הברוכים

די ישיבה האט געהאט די זכיה צו באעהרן א מרביץ תורה וראש החבורה בהלכה הרב רבי נפתלי דוב מרילוס שליט”א וואס האט זיך נארוואס צוריקגעקערט וואוינען דא איו ניו יארק

א שטילקייט האט איבערגענומען דעם זאל ווען עס האט זיך דערהערט די איידעלע שטימע פונעם וועלט-בארימטן מגיד שיעור הגאון ר’ אשר אריאלי שליט”א, מיט פייערדיגע ווערטער צו אויפפלאמען די הערצער מיט אהבת התורה, צו נעמען א חלק מיט די חשוב’ע עמלים בתורה לסעדם ולתמכם

דאן האט מען אויפגעשפילט א מייסטערהאפטיגע פרעזענטאציע באגלייט וואס האט געהאלטן די עולם געשפאנט און האט אויפגעוועקט די אינערליכע געגועין וכיסופין צו זיין א חלק פון די עולם התורה, מיט דאנק צו השי”ת דער נותן התורה פאר די זכי’ צו קענען זיין פון די וועלכע העלפן די גיבורי התורה

צום סיום המעמד האט זיך דער ציבור אויפגעשטעלט מיט פרייליכע ריקודין בשמחת התורה, האנט ביי האנט די חשוב’ע מרביצי תורה מיט די מחזיקי תורה

דער ציבור איז זיך צעגאנגען מיט געהויבענע געפילן, דאנקענדיג השי”ת ששם חלקינו בין יושבי בית המדרש, אז מ’האט די זכי’ צו האבן א חלק און א שותפות מיט די אריבער רבבה לומדי התורה כ”י, און צוהעלפן אז די גראנדיעזע מקום תורה זאל ווייטער אנגיין ביתר שאת וביתר עז